एजेन्सी – युरो २०२० छनोटमा अन्तर्गत सोमबारको खेलमा जर्मनी र नेदरल्यान्ड्सले आ-आफ्नो खेलमा जित दर्ता गरेका छन् । जर्मनीले शीर्षस्थानमा रहेको उत्तरी आयरल्यान्डलाई २-० ले पराजित गर्दै शीर्षस्थानमा उक्लिएको हो ।
जर्मनीका लागि दुवै गोल दोस्रो हाफमा सम्भव भएको थियो । मार्सल हाल्सटनबर्गले ४८ औं मिनेटमा उत्कृष्ट हाफ भली प्रहार गर्दै जर्मनीलाई अग्रता दिलाएका थिए । दोस्रो हाफको इन्ज्युरी समयमा सर्ज गनाब्रीले गोल गर्दै जर्मनीको जित पक्का गरे । काइ हाभर्टजको पासमा गनाब्रीले गोल गर्न कुनै गल्ति गरेनन् ।
पहिलो हाफमा केहि सुस्त प्रदर्शन गरेको जर्मनीले दोस्रो हाफमा भने निकै आक्रमण रणनीति अपनाएको थियो । आयरल्यान्डका गोलरक्षक बेली पिकक-फेरलले केहि राम्रो बचाउ गर्दै अन्तिमसम्म पनि आफ्नो टोलीको सम्भावना कायम राखेका थिए ।
समूहकै अर्को खेलमा नेदरल्यान्ड्सले रायन बाबेलको दुई गोलसँगै इस्टोनियालाई ४-० ले पराजित गर्यो । खेलको १७ औं मिनेटमा बाबेलले डेली ब्लिन्डको क्रसमा गोल गरेका थिए । उनैले ४७ औं मिनेटमा हेडरमार्फत गोल गर्दै अग्रता दोब्बर पारे । उनलाई डिपाएले क्रस उपलब्ध गराएका थिए ।
म्यानचेस्टर युनाइटेडका पूर्वखेलाडी मेम्फिस डिपाएले ७६ औं मिनेटमा उत्कृष्ट प्रहार गर्दो ३-० को स्कोर बनाए । जिओर्जिनियो वाइनल्डमले डिपाएको पासको सदुपयोग गर्दै ८७ औं मिनेटमा हेडर गोल गरेपछि नेदरल्यान्ड्सले फराकिलो जित पक्का गर्यो ।
यस नतिजासँगै समूह ‘सी’ मा जर्मनी शीर्षस्थानमा उक्लिएको छ ।
