‘समाचार र विचारको
साझा चौतारी’




नेपाल र बंगलादेशबीच ‘सेमिफाइनल’ हुने


काठमाडौं (हाम्रो खेलकुद) – घरेलु टोली नेपाल र बंगलादेश १३ औं दक्षिण एसियाली खेलकुदको पुरुष फुटबलतर्फ आइतबार लिग चरणको अन्तिम खेलमा भिड्दैछन् । तर, अंक समिकरणका कारण यो खेल सेमिफाइनल जस्तै हुने भएको छ ।

शनिबार भएको दोस्रो खेलमा भुटानले श्रीलंकालाई पराजित गरेपछि नेपालको फाइनलमा स्थान पक्का हुन सकेन । भुटानले अंक गुमाएको अवस्थामा नेपालको यात्रा सहज हुने थियो । श्रीलंका विजयी भएको खण्डमा नेपाल फाइनलमा पुग्ने थियो । तर भुटानले उत्कृष्ट प्रदर्शन गर्दै श्रीलंकालाई स्तब्ध पार्यो । कास्य पदकको सम्भावनाका लागि लडिरहेको श्रीलंका पदकविहिन हुँदै घर फर्कन बाध्य भयो ।

भुटान भने जितसँगै फाइनलमा स्थान पक्का गर्ने पहिलो टोली बन्यो । भुटानले अन्तर्राष्ट्रिय प्रतियोगिताको फाइनल खेल्न लागेको यो नै पहिलो पटक हो । भुटानले फुटबलमा ऐतिहासिक रजत पदक पक्का गरिसकेको छ । अब आइतबार हुने नेपाल र बंगलादेशको खेलको नतिजाले भुटानको प्रतिद्वन्द्वी यकिन हुनेछ ।

आइतबार हुने खेलमा नेपालले बंगलादेशविरुद्ध हार टार्न सके फाइनलमा स्थान पक्का गर्नेछ । बंगलादेशलाई पराजित गरेको खण्डमा नेपाल शीर्षस्थानमा रहँदै फाइनल पुग्नेछ । बराबरी भएको खण्डमा दोस्रो स्थानमा रहेर स्वर्ण पदकका लागि प्रतिस्पर्धा गर्नेछ । पराजय भोगेको खण्डमा भने नेपाल कास्यमा सिमित हुनेछ । खेल आइतबार साँझ ५ बजे दशरथ रंगशालामा हुनेछ ।

अंक तालिकामा भुटान ४ खेलमा ९ अंकसहित शीर्षस्थानमा छ । नेपाल ३ खेलमा ७ अंकसहित दोस्रो स्थानमा छ । समान ३ खेल खेलेको बंगलादेश तेस्रो स्थानमा छ । पूरै ४ खेल खेल्दै २-२ अंकसहित श्रीलंका र माल्दिभ्स अंक तालिकाको पुछारमा छन् ।

प्रतिकृया दिनुहोस्