फिल्मीखबर, काठमाण्डौ,
सन् २००२ मा प्रदर्शनमा आएको मदन घिमिरे निर्देशित फिल्म ‘माया नमार’ बाट अभिनय करिअर सुरुवात गरेका अभिनेता रमित ढुंगानाले यही फिल्मको सिक्वेलबाट आफ्नो छोरालाई अभिनेतामा लञ्च गर्ने भएका छन् । आइतवार आफ्नो जन्मदिन मनाउने क्रममा उनले यो कुराको खुलासा गरेका हुन् । तर, फिल्मको निर्माण हुन भने अझै ४ देखि ५ वर्ष लाग्ने उनले बताएका छन् ।
उनका छोरा ओजश्वी गएको १५ वर्षदेखि अमेरिकामा बस्दै आएका छन् । कम्प्यूटर इन्जिनियरिङ विषयमा अध्ययन गरिरहेका उनले फिल्ममा अभिनय गर्ने इच्छा देखाएपछि ‘माया नमार २’ बाट डेब्यू गर्ने तयारी गरेको रमितले बताए । उनले भने, ‘मेरो दबाबमा ओजश्वीले फिल्ममा अभिनय गर्न लागेको होइन । ऊ आफैंले इच्छा देखाएपछि फिल्ममा डेब्यूको तयारी गरेका हौं ।’
फिल्म ‘माया नमार’ अभिनेता रमितका दाई अमित ढुंगानाले निर्माण गरेका थिए । यसमा उनको पनि अभिनय थियो । यो फिल्मको दोस्रो श्रृंखलाबाट अमितले आफ्नो छोरा अमिरलाई डेब्यू गर्न लागेका थिए । तर, उनले फिल्ममा अभिनय गर्ने इच्छा नदेखाएपछि रमितका छोरालाई डेब्यू गर्न लागिएको हो । केही महिनायता रमितका छोरा फिल्मका लागि तौल घटाइरहेका छन् ।
आइतवार पिताको जन्मदिन सेलिब्रेसन कार्यक्रममा उपस्थित भएका ओजश्वीले फिल्ममा डेब्यू गर्ने विषयमा भने, ‘मलाई सानैदेखि फिल्ममा अभिनय गर्ने इच्छा थियो । त्यो इच्छा अब चाँडै पूरा हुँदैछ ।’ उनले अमेरिकाबाट ४ वर्षमा आफू अभिनेता बन्न योग्य भएर फर्किने बताए । अभिनेता रमित र निर्माता अमित ‘माया नमार २’ बाट आफ्नो भान्जालाई पनि डेब्यू गर्ने तयारीमा छन् ।
पछिल्लो पटक फिल्म ‘बुद्ध वर्न इन नेपाल’ मा देखिएका अभिनेता रमित ढुंगाना चाँडै फिल्म ‘राजा साहेब’ को छायांकनमा व्यस्त हुँदैछन् । निर्माताबीच मनमुटाव हुँदा निर्धारित समयमा छायांकन सुरु हुन नसकेको फिल्मको माघ पहिलो साताबाट छायांकन सुरु हुँदैछ । यो फिल्मका लागि रमितले १८ लाख पारिश्रमिक लिएको चर्चा छ । बिचल किराँतीले फिल्मले निर्देशन गर्दैछन् ।