काठमाडौं – प्रदेश नम्बर ३ को प्रादेशिक क्रिकेट संघको अध्यक्षमा राजु बस्नेत निर्वाचित भएका छन् । शनिबार मकवानपुरको हेटौंडामा भएको निर्वाचनमा राजुले ललितपुरका नरेश राणालाई ३ भोटले हराउँदै अध्यक्ष चुनिएका हुन् । राजुले कुल १३ भोट तथा नरेशले १० भोट प्राप्त गरे ।
प्रेम बहादुर क्षेत्री उपाध्यक्षमा सर्वसम्मत चुनिए । प्रशन्न शाक्यलाई पाँच भोटको अन्तरले पराजित गर्दै दुर्गाराज पाठक सचिवमा निर्वाचित भएका छन् । कोषाध्यक्षमा अनिल अधिकारी चुनिएका छन् । अधिकारीले रत्न हरि प्रधानाङ्गलाई पराजित गरेका हुन् । महेश्वरी डङ्गोल,प्रज्वल सापकोटा,सुदिप पिया, रुपक रञ्जित,सुजन महर्जन,अजय बीर पाण्डे,अनुज मान श्रेष्ठ,राजु गुप्ता र उमेश पिया सदस्यमा चुनिएका छन् ।
योसँगै जिल्ला र सबै प्रदेशको चुनाव सकिएको छ । अव क्यानको निर्वाचन हुने छ । क्यानको चुनाव असोज पहिलो साता हुने तयारीमा रहेको छ । नेपाल क्रिकेट संघ (क्यान) २०७३ वैशाख देखी आईसीसीको निलम्बनमा रहेको छ । उक्त निलम्बन फुकुवा गर्नको लागि आईसीसीको विधान अनुसार जिल्ला,प्रदेश हुँदै क्यानको निर्वाचन गर्नु पर्ने हुन्छ ।(हाम्रो खेलकुद)
