एजेन्सी । म्यानमारको उत्तरपश्चिममा रहेको एउटा गाउँमा सेनाले गरेको हवाई आक्रमणमा नौ बालबालिकासहित कम्तीमा १७ सर्वसाधारणको मृत्यु भएको छ । करिब २० जना घाइते समेत भएका छन् । भारतीय सीमाना ठीक दक्षिणमा पर्ने सागाङ क्षेत्रको खम्पाट सहरको कानन गाउँमा बिहानै हवाई आक्रमण भएको स्थानीयवासी र मानवअधिकारकर्मीको दाबी छ ।
तर, सैनिक सरकारले आक्रमणको जिम्मेवारी लिन अस्वीकार गर्दै समाचारमा कुनै सत्यता नभएको दाबी गरेको छ । सेनाले सन् २०२१ को फेब्रुअरीमा आङ सान सु–कीको निर्वाचित सरकारलाई अपदस्थ गरेपछि धेरै संगठनहरूले हतियार उठाएका छन् । त्यसयता देशका धेरै ठाउँमा सेना र उनीहरुबीच द्वन्द्व चलिरहेको छ । विगत दुई वर्षदेखि सैनिक सरकारले विद्रोहीविरुद्ध हवाई आक्रमणलाई तीव्रता दिएको छ।
उद्धार प्रयासमा सहयोग गर्ने एक स्थानीय बासिन्दाले आइतवार एपीलाई भने कि जेट फाइटरले खम्पाटको बाहिरी भागमा रहेको कानन गाउँमा तीनवटा बम खसालेको थियो। जसका कारण गाउँका विद्यालय र वरपरका भवनमा बस्ने १७ जना सर्वसाधारणको मृत्यु भएको छ । बम विष्फोटबाट विद्यालय नजिकैका १० घर ध्वस्त भएको एक स्थानीयले नाम न छाप्ने सर्तमा बताए । खम्पाट सहरका अधिकांश बासिन्दा अल्पसंख्यक इसाई धर्मावलम्बी हुन् ।
म्यानमार मुख्यतया बौद्ध धर्मावलम्बी हो, जसको नेतृत्व बर्मन बहुसंख्यकले गर्छ । अर्को प्रत्यक्षदर्शीले नाम न छाप्ने सर्तमा बोल्दै, एपीलाई आक्रमण पछिको तस्बिरहरू पनि उपलब्ध गराए, जसमा मृतक र घाइते व्यक्तिहरू र क्षतिग्रस्त भवनहरू समावेश छन् । राज्य एमआरटीभी टेलिभिजनले एक अज्ञात अधिकारीलाई उद्धृत गर्दै भने कि आइतबार बिहान यस क्षेत्रमा कुनै पनि विमान उडान थिएन।EmountainTv
