सोच राम्रो बनाइ


कविता
छन्द—मन्दाक्रान्ता

फुल्छन् चाहा सबजन जुटे,फल्छ हाम्रो धरामा
बोली हाम्रा सलबल भए,दूर त्यो कन्दरामा।
हामी आफै जगत भरमा,जुट्नु पर्नेछ भोली
हाम्रो भाषा अटल रहँदै,उठ्छ संस्कार खोली।।

ती खाटामा जब तब सँधै,ध्यान साँचो जगाऊ
यो माटामा हर समयमा, ज्ञान राम्रो लगाऊ।
यी आकाङ्क्षा सुख सयलका, सल्बलाएर साथी
आऊ आऊ सबजन मिली,जानु पर्नेछ माथि।।

राम्रो आशा सफल ममता,राख भित्री कुनामा
माया गर्दै जगत जननी, सत्य बान्दै तुनामा।
आऊ राम्रा असल जन हो, आउँदै साथ देऊ
जो छन् दुःखी तल जनहरू,हो त्यहाँ हात देऊ।।

छन् सन्नाटा सबतिर जहाँ,फाल्नु सर्दै अगाडि
टेक्दै गोडा हिमशिखरमा,चढ्नु बढ्दै अगाडि।
देखिन्छन् ती सफल चुचुरा,पाउ टेक्दै बढेमा
जो पुग्नेछन् समय पलमा,त्यो उकालो चढेमा।।

नेपालीका असल जन हो,सोच राम्रो बनाइ
जुट्दै आऊ हर मनहरू,भेष आफ्नो समाइ।
छाओस् आशा सबतिर जहाँ,उठ्नु पर्नेछ मित्र
हाम्रो भाषा अति सहजले,बोल्नु यो देश भित्र।।

माईजोगमाई —१, इलाम(फेसबुकबाट साभार)

50% LikesVS
50% Dislikes