योगेन्द्र योगी
काठमाडौं । साउदीले राज्यभरका सबै क्षेत्रमा निरीक्षण छापा मार्दा एक साताभित्रै १९ हजारभन्दा बढी अवैध बसोबास गर्नेलाई पक्राउ गरेको छ । तीमध्ये ११ हजार ४ सय २७ जना रेसिडेन्सी कानुन उल्लंघन गर्ने, ४ हजार ६ सय ९७ जना सीमा सुरक्षा कानुन उल्लंघन गर्ने र ३ हजार १ सय ९७ जना श्रम कानुन उल्लंघन गर्नेहरू परेका छन् ।
कानुन उल्लंघन गर्ने देखेमा रिपोर्ट गर्न साउदी सरकारको आग्रह
१८ देखि २४ जनवरीसम्मको अवधिमा सुरक्षा निकाय र सम्बन्धित सरकारी निकायले गरेको संयुक्त क्षेत्रीय सुरक्षा अभियानका क्रममा उनीहरू पक्राउ परेका हुन् । सीमा पार गरेर राज्यमा प्रवेश गर्न खोज्दा पक्राउ परेकाको संख्या १ हजार ७० पुगेको छ । जसमध्ये ३१ प्रतिशत यमनी, ६७ प्रतिशत इथियोपियाली नागरिक र २ प्रतिशत अन्य राष्ट्रका रहेका छन् ।
अवैध रूपमा राज्यबाहिर सीमा पार गर्न खोज्दा करिब १ सय ९३ जना पक्राउ परेका छन् । बसोबास, काम र सीमा सुरक्षा नियम उल्लंघन गर्ने, ओसारपसार गर्ने र काममा लगाउने तथा आश्रय दिने ११ जना पनि पक्राउ गरिएको साउदीको आन्तरिक मन्त्रालयलाई उद्धृत गर्दै साउदी गजेटले जनाएको छ ।
उल्लंघनका लागि विभिन्न चरणमा रहेका कानुनी प्रक्रियामा रहेका ५० हजार ४ सय ८९ पुरुष र ५ हजार २ सय ६७ महिलासहित कुल ५५ हजार ७ सय ५६ प्रवासी रहेका छन् । साथै, ४९ हजार ५ सय ५३ उल्लंघनकारीलाई यात्रा कागजात प्राप्त गर्न तिनीहरूको कूटनीतिक नियोगहरूमा पठाइएको थियो भने १ हजार १ सय ८ उल्लंघनकारीलाई उनीहरूको यात्रा आरक्षण पूरा गर्न सन्दर्भ गरिएकामा १० हजार ५ सय ३७ उल्लंघनकारीलाई देश निकाला गरिएको जनाएको छ ।
साथै, मन्त्रालयले मानिसहरूलाई मक्का, रियाद र पूर्वी प्रान्तका क्षेत्रहरूमा ९११ नम्बर र राज्यका बाँकी क्षेत्रहरूमा ९९९ र ९९६ नम्बरहरूमा कल गरेर उल्लंघनको कुनै पनि घटनाहरू रिपोर्ट गर्न आग्रह गरेको छ ।
पछिल्लो समय साउदीले भिसाको म्याद सकिएर लुकिछिपी बस्ने आप्रवासीलाई लक्षित गरि धडपकड अभियान तीव्र पारेसँगै गैरकानुनी रूपमा त्यहाँ कार्यरत सयौं नेपाली पनि पक्राउ परेका र हाल उनीहरूलाई जेलमा राखिएको छ । जेल अवधि समाप्त गरेपछि आवश्यक कानुनी प्रक्रिया पूरा गरी डिपोर्ट गर्ने गरेको छ ।
साउदी अरेबियाका विभिन्न कम्पनी तथा प्रतिष्ठानहरूमा कार्यरत रहँदा साउदी आवासीय अनुमतिपत्र (इकामा) नबनाइएका वा नवीकरण नगरिएका वा हुरूब लगाइएका नेपालीहरूलाई स्वदेश फर्काउन आवश्यक बहिर्गमन भिसाका लागि सम्बन्धित साउदी निकायमा अनुरोध गरिएको थियो । अवैध रूपमा साउदीमा रहेका आप्रवासी कामदार स्वदेश फर्कनुपरे अनिवार्य रूपमा एक्जिट भिसा आवश्यक पर्छ ।
एक्जिट भिसा नभएसम्म कामदार स्वदेश फर्कन पाउँदैनन् । सम्बन्धित मुलुकको दूतावासले अनुरोध गरेपछि साउदी सरकारले एक्जिट भिसा उपलब्ध गराउने गर्छ । यस्तै, रियादस्थित नेपाली दूतावासको अनुरोधमा साउदी सरकारले गैरकानुनी रूपमा बसेका नेपालीहरूलाई पनि एक्जिट भिसा दिँदै आएको छ ।राजधानी दैनिकबाट ।
