एजेन्सी – न्युजिल्यान्ड भ्रमणमा रहेको भारतीय क्रिकेट टोलीलाई ठूलो झट्का लागेको छ ।
टोलीका प्रमुख ब्याट्सम्यान तथा ओपनर रोहित शर्माले न्युजिल्यान्डको बाँकी भ्रमण गुमाउने भएका छन् । खट्टाको पेडुलामा समस्या आएपछि उनले तीन ओडीआई र दुई टेष्ट सिरिजबाट बाहिरिएका हुन् । रोहित आईतबार न्युजिल्यान्डसँगको पाँचौ टि ट्वान्टी खेलमा ४१ बलमा ३ चौका र ३ छक्का सहित ६० रनमा खुट्टाको पेडुलामा समस्या आएपछि रिटायर्ट हर्ट भएका थिए ।
उक्त खेलमा विराट कोहलीलाई विश्राम दिदै रोहितले कप्तानी गरेका थिए । तर दोस्रो इनिङमा उनी मैदान नआएर लोकेश राहुलले कप्तानी गरेका थिए । भारतलाई पाँच टि ट्वान्टी सिरिज ५-० ले जिताउन रोहितले उत्कृष्ट प्रर्दशन गरेका थिए । पहिलो ओडीआई माघ २२, दोस्रो २५ र अन्तिम २८ मा हुने छ ।
न्युजिल्यान्ड र भारतबीच दुई टेष्ट हुने छ । पहिलो टेष्ट फागुन ९ देखी १३ सम्म तथा दोस्रो टेष्ट फागुन १७ देखी २१ सम्म हुने छ । प्राय खेलमा शीर्ष तीन ब्याट्सम्यानमा निर्भर देखिने भारतीय टोलीलाई रोहित नहुँदा ठूलो असर पर्न सक्ने अनुमान गरिएको छ । रोहितको स्थानमा अव भारतीय क्रिकेट कन्टोल बोर्ड (बिसिसिआई) ले मयंक अग्रवाल वा शुभमन गिललाई मौका दिन सक्ने संभावना छ ।
