पशु चिकित्सक भन्छन्– दूषित मासु खाँदा प्राणघातक रोग लाग्न सक्छ
ईश्वरराज ढकाल
काठमाडौं ।
दूषित मासु खाँदा झाडापखाला, इकोलाई, क्षयरोग, रेबिज, पीपीआर, बु्रसेला, एन्थ्रास, जुका पर्ने, आउ रगतमासी, चर्मरोग, वान्ता आउने, पातलो दिशा लाग्ने र खान मन नलाग्ने, छाला चिलाउने, फुस्रो हुने, घाउखटिरा आउने र पाक्ने, ब्रेनसिस्ट, दमलगायतका रोग लाग्ने सक्ने भन्दै चेकजाँच गरिएका चौपायाको मासु खान आग्रह गरेको छ ।
चेकजाँच नगरी चौपायाको बिक्री गर्दा मानिसमा प्राणघातक रोग सर्न सक्ने सम्भावना रहेको जनाउँदै हाइजेनिक मासु खुवाउन उपत्यका भित्रने पशु चौपायाको स्वास्थ्य परीक्षण गरेको हो । केन्द्रीय रिफरल पशु चिकित्सालयका पशु चिकित्सक खितबहादुर श्रेष्ठले उपत्यकावासीलाई ताजा मासु खुवाउने रणनीतिसहित पशु चौपायाको स्वास्थ्य परीक्षण गरिएको बताउनुभयो ।
उहाँले भन्नुभयो– ‘हामीले मासु खाँदा लाग्न सक्ने प्राणघातक रोगबाट नागरिकलाई जोगाउन अनिवार्य स्वास्थ्य परीक्षण शुरु गरेका हौं ।’ उहाँले परीक्षण नगरेको चौपायको मासु खाँदा डरलाग्दो रोगको संक्रमण बढ्न सक्ने भएपछि राजधानीका बिक्री स्थलमा खसी, बोका, बाख्रा, च्याङ्ग्राको चेकजाँच शुरु गरेको जानकारी दिनुभयो । पशुसेवा विभागले उपत्यकाका ११ स्थानमा पशुु चौपायाको स्वास्थ्य परीक्षण शुरु गरेको छ ।
उहाँका अनुसार बिक्री केन्द्रबाट करिब २५ हजारको संख्यामा पशुचौपायाको स्वास्थ्य परीक्षण गरिसकेको छ । विभागको नेतृत्वमा खटिएका दुई चिकित्सकसहित ५ जना प्राविधिक टोलीले कलंकीबाट मात्र दैकिक २ हजारको संख्यामा चौपायाको स्वास्थ्य परीक्षण गरेको छ । विभागले घटस्थापनादेखि पशुचौपायाको स्वास्थ्य परीक्षण गरिरहेको छ ।
टोलीले शुरुमा चौपायाको ज्वरो परीक्षण गर्ने, त्यसपछि आँखा पाकेको, झाडा पखाला, रेबिज वा अन्य कुनै पनि प्राणघातक रोग लागे वा नलागेको परीक्षण गर्ने र त्यसपछि रोगी देखिएका चौपायाको सिङमा रातो र निरोगीको सिङमा हरियो रङ लगाउने गरेको छ ।
पशु चिकित्सक श्रेष्ठले हालसम्म परीक्षण गरिएका मध्ये कुनै पनि चौपायामा गम्भीर रोग नलागेको जानकारी दिनुभयो ।
खाद्य व्यवस्था तथा व्यापार कम्पनीले उपत्यकामा २ हजार खसीबोका र १ हजारको संख्यामा च्याङ्ग्रा बिक्री शुरु गरेको छ । पशु स्वास्थ्य बिभागले अष्टमीको दिन अर्थात् कात्तिक ५ गते बिहान ७ देखि ११ र दिउँसो ३ देखि साढे ५ बजेसम्म स्वास्थ्य परीक्षण गर्नेछ ।
टोलीले कलंकी खसीबजार, बल्खु, कालिमाटी माछा बजार, चोभार नाका, चाल्नाखेल, राँगा बजार, टुकुचा खसी बजार, खाद्य संस्थान, लोकन्थली खसी बजार, साल्लाघारी च्याङ्ग्रा बजार, बालाजु बाइपास नाका, लगनखेल, धापाखेल, आकाशे धारा, थानकोट, दहचोक, मूलपानीमा परीक्षण जारी राखेको छ ।
यसैबीच काठमाडौं महानगरले राजधानीको मासु बिक्रीस्थलको अनुगमन जारी राखेको छ । कामपा पशुपंक्षी तथा कृषि विभागले चौपाया बधस्थल र मासु बिक्री केन्द्रको अनुगमन शुरु गरेको जनाएको छ । विभागका प्रमुख डा. अवधेश झाका अनुसार महानगरवासीलाई स्वस्थ मासु खुवाउने उद्देश्यले अनुमगनलाई तीव्रता दिएको बताउनुभयो । स्थानीय निकायमा उपप्रमुखको संयोजकत्वमा अनुगमन टोली गठन भई निरन्तर अनुगमन गरिरहेको छ ।नेपाल समाचारपत्रबाट ।
