खेलकुद

लगातार जितसँगै पोर्चुगल नकआउट चरणमा पुग्यो

कतार (हाम्रो खेलकुद) – पोर्चुगल लगातार दोस्रो जितका साथ फिफा विश्वकप कतार २०२२ को नकआउट चरणमा प्रवेश गरेको छ ।

सोमबार लुसले रंगशालामा ब्रुनो फर्नान्डेसको दुई गोलमा उरुग्वेलाई २-० ले पराजित गर्दै पोर्चुगल एक खेल बाँकी रहँदै नकआउट चरणमा पुगेको हो । निकै प्रतिस्पर्धात्मक खेलमा दुवै टोलीले गोलको अवसर पाएका थिए ।

तुलनात्मक रूपमा आक्रमणमा बढि व्यस्त देखिएपनि उरुग्वेले अवसर सदुपयोग गर्न सकेन । बल पोसेसनमा सहज देखिएको पोर्चुगलविरुद्ध उरुग्वे काउन्टर अट्याकमा समस्या दिन सफल भएको थियो । खेलमा १-० ले पछाडी परेपछि आक्रमणमा जोड दिएपनि उरुग्वेले बराबरी गोल फर्काउन सकेन । इन्ज्युरी समयमा ब्रुनोले पेनाल्टीमा गोल गर्दै अग्रता दोब्बर पारे ।

खेलको तेस्रो मिनेटमै पोर्चुगलले पोस्टमा आक्रमण गर्ने अवसर पाएको थियो । रोनाल्डोले छातीले दिएको पासमा विलियम कार्भाल्होले पेनाल्टी क्षेत्र भित्रबाट भली प्रहार पोस्टभन्दा निकै माथिबाट गएको थियो ।

खेलको ३२ अ‍ौं मिनेटमा उरुग्वेले अग्रता लिने सुवर्ण अवसर खेर फाल्यो । रोड्रीगो बेन्टान्कुरले मिडफिल्डबाट एक्लै बल बढाउँदै पोर्चुगलको डिफेन्स लाइन बिट गरे । उत्कृष्ट बल नियन्त्रण गर्दै पेनाल्टी क्षेत्र भित्रबाट वन भर्सेस वनको स्थितिमा उनको प्रहार गोलरक्षक डिअ‍ोगो कोस्टाले बचाए ।

दोस्रो हाफको ५४ अ‍ौं मिनेटमा पोर्चुगलले अग्रता लियो ‌‌। ब्रुनो फर्नान्डेसले पेनाल्टी क्षेत्र बाहिरबाट रोनाल्डोतर्फ दिएको लामो पास गोलमा परिणत भएको थियो ‌‌। रोनाल्डो हेडरका लागि उफ्रेको अवस्थामा गोलरक्षक सर्जियो रोसेटले बलको दिशा बुझ्न नसक्दा गोल सम्भव भएको थियो ।

७५ अ‍ौं मिनेटमा उरुग्वेका म्याक्सी गोमेजको प्रहारमा गोलरक्षक कोस्टा बाधक बने । लगत्तै फ्रिकिकमा आएको रिबाउन्डमा लुइस सुआरेज बललाई पोस्टको दिशा दिनबाट चुके । त्यसको एक मिनेट नबित्दै फेडे भालभर्डेको पासमा जिअर्जिअन डे आरासेटाको चिप प्रहार कोस्टाले दोस्रो प्रयासमा जोगाए ।

इन्ज्युरी समयको पहिलो मिनेटमा पोर्चुगलका लागि ब्रुनोले पेनाल्टीमा दोस्रो गोल गरे । भिडियो एसिसेन्ट रेफ्रीले उरुग्वेको बक्सभित्र ह्यान्ड भएको निर्णय लिएपछि प्राप्त पेनाल्टीमा ब्रुनो गोल गर्न सफल भए । इन्ज्युरी समयको अन्त्यतिर ब्रुनोको ह्याट्रिक प्रयासमा गोलरक्षक र पोस्ट बाधक बने । उनको पहिलो प्रहार गोलरक्षक रोसेटले विफल पारे । लगत्तै पेनाल्टी क्षेत्र बाहिरबाट गरेको प्रहार पोस्टमा लाग्दै बाहिरियो ।

यस समूह अन्तर्गत आजै भएको खेलमा घानाले दक्षिण कोरियालाई ३-२ ले पराजित गरेको थियो ।

यस नतिजासँगै पोर्चुगल समूहको शीर्ष स्थानमा उक्लिएको छ ‌। लगातार दोस्रो जितसँगै ६ अंक जोडेको पोर्चुगल नकआउट चरणमा प्रवेश गरेको छ । घानाको ३ अंक छ भने उरुग्वे र दक्षिण कोरियाको १-१ अंक छ । अन्तिम खेलमा पोर्चुगलले दक्षिण कोरिया र घानाले उरुग्वेको सामना गर्नेछ ।

Leave a Reply

Your email address will not be published. Required fields are marked *

Related Articles

Back to top button