खबर

धम्कीपूर्ण अभिव्यक्ति प्रति नेपाल पत्रकार महासंघ, नेपाल प्रेस युनियनलगायतका संघसंगठको आपत्ति

काठमाडौ ।

राष्ट्रिय स्वतन्त्र पार्टी (रास्वपा) का सभापति रवि लामिछानेले नेपाली सञ्चारगृह र सञ्चारकर्मीमाथि गरेको टिप्पणीप्रति पत्रकारका विभिन्न संघसंगठनले आपत्ति जनाएका छन्। लामिछानेले आइतबार रास्वपा केन्द्रीय कार्यालय बसुन्धरामा आयोजना गरेको पत्रकार सम्मेलनमा नेपाली सञ्चारगृह र सञ्चारकर्मीमाथि संगीन आरोप लगाउँदै धम्कीपूर्ण अभिव्यक्ति दिएका थिए। त्यसप्रति नेपाल पत्रकार महासंघ, नेपाल प्रेस युनियनलगायतका संघसंगठनले आपत्ति जनाएका हुन्।

‘लामिछानेले नेपाली सञ्चार क्षेत्रप्रति आधारहीन र पूर्वाग्रही आरोप लगाउँदै धम्कीपूर्ण अभिव्यक्ति दिनु प्रेस तथा अभिव्यक्ति स्वतन्त्रतामाथिको गम्भीर प्रहार हो,’ नेपाल पत्रकार महासंघका केन्द्रीय महासचिव रोसन पुरीद्वारा हस्ताक्षरित विज्ञप्तिमा छ, ‘संसद्को चौथो ठुलो दलका अध्यक्ष तथा उपप्रधान तथा गृहमन्त्रीसमेत भइसकेका व्यक्तिले सञ्चार क्षेत्रप्रति संयम गुमाएर अभिव्यक्ति दिनु समग्र सञ्चार क्षेत्रमाथिको प्रहार हो।’

सञ्चार प्रतिष्ठान र सञ्चारकर्मीको नामै लिएर सार्वजनिक रूपमा धम्की दिइनुले नेपालका सञ्चार प्रतिष्ठन र सञ्चारकर्मी असुरक्षित हुन सक्ने भन्दै महासंघले चिन्ता व्यक्त गरेको छ। लामिछानेको अभिव्यक्तिले कुनै अप्रिय घटना भएमा त्यसको जिम्मेवारी स्वयं लामिछाने र उनको पार्टी हुने विज्ञप्तिमा उल्लेख छ।

संघीय लोकतान्त्रिक गणतन्त्रको स्थापना, प्रेस तथा अभिव्यक्ति स्वतन्त्रताको रक्षा र नागरिक अधिकारका पक्षमा निरन्तर संघर्ष गरेको नेपाली प्रेस कुनै पनि दल वा व्यक्तिको धम्कीबाट विचलित नहुने महासंघले जनाएको छ। रास्वपाका अध्यक्ष लामिछाने पत्रकारप्रति धम्कीपूर्ण शैलीमा प्रस्तुत हुनु आपत्तिजनक र अशोभनीय भएको महासंघको ठहर छ।

यस्तै प्रेस युनियनका महासचिव दिलीप पौडेलद्वारा हस्ताक्षरित विज्ञप्तिमा लामिछानेले आफ्ना कमीकमजोरी ढाकछोप गर्न सञ्चारमाध्यम, सञ्चारकर्मी र समग्र पत्रकारिता क्षेत्रलाई बदनाम गर्ने ध्येयले प्रमाणहीन आरोप लगाएको उल्लेख छ। ‘पूर्वसञ्चारकर्मी लामिछानेले कुनै आधार र प्रमाणबिना सञ्चारमाध्यम, सम्पादक र समग्र पत्रकारितालाई बदनाम गर्नेगरी दिएको अभिव्यक्ति खेदजन्य छ,’ विज्ञप्तिमा लेखिएको छ, ‘एक राजनीतिकर्मीले दिएका अभिव्यक्ति अपरिपक्व र अराजनीतिक छन् भन्ने बुझाइ युनियनको छ।’

सञ्चारकर्मबाटै राजनीतिक आधारभूमि तयार पारेका लामिछानेले मिडियालाई दुष्मनको जस्तो व्यवहार गरेर घेराउ गर्नेसम्मको अभिव्यक्ति दिनु अशोभनीय भएको युनियनको ठहर छ। लामिछानेको नागरिकताबारे सञ्चारमाध्यमले जनतासम्म सूचना पुर्‍याएकै आधारमा उनले यसरी आक्रोश पोखेको विज्ञप्तिमा उल्लेख छ। अदालतको फैसलाले उनले नेपाली नागरिकत नलिएको पुष्टि भइसकेको विज्ञप्तिमा जनाइएको छ।

यसैगरी नेपाल पत्रकार महासंघ, प्रतिष्ठान प्रदेश समितिले पनि लामिछानेको अभिव्यक्तिको निन्दा गरेको छ। समितिका महासचिव रामकुमार शाहीले विज्ञप्ति जारी गरी लामिछानेले सञ्चार प्रतिष्ठान र सञ्चारकर्मीको नामै लिएर सार्वजनिक रूपमा दिएको धम्कीको निन्दा गरिएको छ।नागरिक दैनिकमा खबर छ ।

Leave a Reply

Your email address will not be published. Required fields are marked *

Related Articles

Back to top button