एजेन्सी – घरेलु मैदानमा सहज जित निकाल्दै सेभियाले स्पेनिस ला लिगाको शीर्षस्थानमा रहेको रियल म्याड्रिडसँगको अंक दुरी छोट्याएको छ । सेभियाले घरेलु मैदानमा इल्चेलाई २–० ले पराजित गरेको हो ।
रोमन सान्चेज पिजुवानमा शुक्रबार राति भएको खेलमा घरेलु टोलीको जितमा एलेसान्द्रो गोमेज र राफा मिरले गोल गरे । दुवै गोल दोस्रो हाफमा भएको थियो । पाहुना टोलीलाई दवावमा राखेपनि सेभियाले गोलको लागि दोस्रो हाफ नै कुर्नुपरेको थियो ।
७०औं मिनेटमा एलेसान्द्रो गोमेजले गोल गर्दै घरेलु टोलीलाई १–० को अग्रता दिलाए । त्यसको ६ मिनेटपछि राफा मिरले एन्थोनी मार्सियालको पासमा गोल गर्दै टोलीको जित पक्का गरे ।
यो जितसँगै सेभियाले शीर्षस्थानको रियलसँगको अंक दुरी ३ मा छोट्याएको छ । सेभियाको २४ खेलबाट ५० अंक पुगेको छ । एक खेल कम खेलेको रियलको ५३ अंक छ । पराजित इल्चे २६ अंक जोडेर १४औं स्थानमा रहेको छ ।हाम्रो खेलकुदबाट ।
