झापा ।नेपाल कम्युुनिष्ट पार्टी )नेकपा) निकट विद्यार्थी संगठन अनेरास्ववियु मेचीनगर कमिटीले आज काँकरभिट्टामा भारत विरुद्ध साँकेतिक विरोध प्रदर्शन गरेको छ ।
नगर कमिटी अध्यक्ष सन्तोष धमला नेतृत्वको टोलीले नेपाली भूमि अतिक्रमण गर्दै भारत सरकारले चीनसँगको बाटो बनाएको विरोधमा प्रदर्शन गरेको हो ।
संगठनका जिल्ला सह संयोजक दुर्गा धमलाको विशेष उपस्थितिमा भेला भएका विद्यार्थीहरुले भारतीय हस्तक्षेप विरुद्ध विभिन्न नारा लेखिएका प्लेकार्ड बोकेका थिए ।
विद्यार्थी नेताहरुले नेपालको रास्ट्रिय झन्डा र संगठनको झन्डासहित स्थानीय लक्ष्मीनारायण मन्दिर अगाडि भेला भएर प्रदर्शन गरेका हुन् ।
त्यसक्रममा संगठनका त्रिदेव बहुमुखी क्याम्पस कमिटी सचिव आशिष पौडेल, विनोद रिमाल, मञ्जु चिमरिया, विनम सरदार, वीरू मेचे, दीक्षा खड्का, श्याम तिम्सिनालगायतको उपस्थिति थियो ।
नेपालको दार्चुला जिल्लामा पर्ने गुन्जीबाट लिपुलेक जोडिने क्षेत्र भारतले अतिक्रमण गर्दै तिब्बतमा रहेको कैलाश मानसरोवर सडक बनाएपछि अखिलका नेता कार्यकर्ताहरुले विरोध जनाएका हुन् ।
