वैशाख २, २०७८
काठमाडौं (हाम्रो खेलकुद)– नेपाली राष्ट्रिय फुटबल टोलीका कप्तान किरण चेम्जोङले अर्को साताबाट बाट सुरु हुने खुकरी नेपाल सुपर लिग (एनएसएल) खेल्ने भएका छन् । उनले धनगढी फुटबल एफसीबाट एनएसएल खेल्ने भएका छन् ।
ड्रिमर्स प्रा लिगको स्वामित्वमा रहेको धनगढी एफसीले बिहीबार पत्रकार सम्मेलन गर्दै मुख्य प्रशिक्षक र आइकोनिक खेलाडी घोषणा गरेको छ । धनगढीले राष्ट्रिय टोलीका पूर्व खेलाडी समेत रहेका युगलकिशोर राईलाई मुख्य प्रशिक्षक नियुक्त गरेको छ । राई एएफसी ए लाइसेन्स प्रशिक्षक हुन् । उनको प्रशिक्षणमा हालै झापा फुटबल क्लबलाई प्रशिक्षण दिएका थिए ।
सफल व्यासायिक खेलाडी किरणले राउन्डग्लास पञ्जाब एफसीबाट आई लिग खेलेका थिए । आई लिगको आफ्नो अन्तिम खेल अघि स्वदेश फर्केका किरणको नेतृत्वमा नेपालले चैत १६ गते थ्री नेसन्स कप मैत्रीपूर्ण फुटबल सिजनको उपाधि जितेको थियो । त्यसलगत्तै उनी एएफसी प्ले अफर दी विक चुनिएका थिए ।
पछिल्लो पाँच वर्षदेखि विदेशी लिगमा व्यस्त किरण घरेलु फुटबलमा फर्केका छन् । दशरथ रंगशालमा लामो समयपछि उनले व्यवसायिक फुटबल खेल्न लागेका हुन् ।
