
बुधबार, जेष्ठ २८, २०७७
एजेन्सी – बायर लिभरकुसन जर्मन कपको फाइनलमा प्रवेश गरेको छ । मंगलबार राति भएको खेलमा चौथो श्रेणीको साब्रुकेनमाथि ३–० को सहज जित निकाल्दै उपाधि नजिक पुगेको हो ।
कोरोना महामारी शुरु भएयता ९४ दिन फुटबलबाट टाढा रहेको साब्रुकेनमाथिको सहज जितमा डियाबी, लुकास एलारियो र करिम बेलारावीले गोल गरे । लिभरकुसनले भने पछिल्लो एक महिनामा यो सँगै ६ खेल खेलेको छ ।
एकपक्षीय बनेको खेलको ११औं मिनेटमा डियाबीले गोल गर्दै लिभरकुसनलाई अग्रता दिलाएका थिए । उनको भली प्रहार साब्रुकेनका गोलरक्षक बाट्जले रोक्ने कुनै मौका नै पाएन । १९औं मिनेटमा लुकास एलारियोले गोल गरेपछि लिभरकुसनले पहिलो हाफमा २–० को अग्रता लिन सफल भयो ।
५८औं मिनेटमा सब्सिच्युट खेलाडी बेलारावीले गोल गर्दै लिभरकुसनलाई ३–० को सहज जित दिलाए । बेलारावी दोस्रो हाफको शुरुमै विट्जको स्थानमा मैदान छिरेका थिए । साब्रुकेनले सेमिफाइनलसम्मको यात्रामा दुई बुन्डेस लिगा क्लब र दुई दोस्रो श्रेणीको क्लबलाई पराजित गरेका थिए ।
साब्रुकेनले बुन्डेस लिगा क्लब फोर्टुना डुसेलडर्फ र एफसी कोल्नलाई तथा दोस्रो श्रेणीको काल्र्सरुहर र रेगेन्सवर्गलाई पराजित गर्दै पहिलोपटक सेमिफाइनलको यात्रा तय गरेका थिए । साब्रुकेनले ७ मार्चयता खेलेका थिएनन् । साब्रुकेन च्याम्पियन हुदै तेस्रो श्रेणीमा बढुवा भइसकेको छ ।
अब लिभरकुसनले उपाधिका लागि बायर्न म्युनिख र फ्रान्कफर्टबीचको विजेतासँग ४ जुलाईमा खेल्नेछ ।hamrokhelkud/from



