
कविता
माथि शिरमा टलटल टल्कने हिमालको स्वच्छ पानी
निलो ताल अनि पोखरी रमणीय छन् प्रकृतिका खानी
तराईका खेतमा लहलहाइ चम्कने अन्नका छन भकारी
बेँसीका फाँट फलफूल मिठा फल्दछन ताजा तरकारी ।
मेरो देशको चमक मिठो पहाड पाखा छन् उज्यालो
हरिया वन छन रनघन सुरम्य छागा झरना छन नौलो
नेपालीहरूको हँसिलो मुहार दिन्छन मिठो मुस्कान
गुम्बा मन्दिर चर्च मस्जिदहरूले मेटाइदिन्छन थकान ।
भाषाका भित्र छन अनेकता यहाँ पाइन्छन् मिठोपन
भेषका अनेकता देखेर मन यो फुरूङ्ग हुन्छ झन्झन
पुर्खाको इतिहास पढेर छाती यो आनन्दमा फुल्दछ
हिमाल हाँसेर पहाड खुल्दिदा तराईमा धान झुल्दछ ।
गीतमा मोहनी सारंगी मादल अनेक छन लोकभाका
रीतमा रमाइला रिवाजहरू छन रमाइला छन पाखा
गर्व छ खुशी छौँ हामी यही माटोमा चन्द्रसूर्य उचाली
परिश्रम गरेर नवरत्न जोडेर लौ मिली बाँचौ नेपाली ।।


